Ўзбекистонга 401 миллион сўмлик товарларни ноқонуний олиб кирганлар қўлга олинди
Ўзбекистонга 401 миллион сўмлик товарларни ноқонуний олиб кирганлар қўлга олинди. Бу ҳақда Божхона бошқармаси ахборот хизмати «Tez News»га хабар берди.
Фото: Божхона бошқармаси ахборот хизмати
Маълум қилинишича, божхона органлари томонидан Тошкент шаҳрида фаолият олиб борувчи бир гуруҳ шахслар томонидан мамкалатга ноқонуний йўллар орқали олиб кирилган, хорижда ишлаб чиқарилган товар-моддий бойликларнинг ноқонуний айланмасига чек қўйишга қаратилган тезкор тадбир ўтказилган.
Тадбир давомида, Тошкент шаҳар божхона бошқармаси Контрабандага қарши курашиш ва божхона аудити бўлими ҳамда ички ишлар ходимлари томонидан фуқаро А.А. бошқарувидаги «Исузу» русумли транспорт воситасини белгиланган тартибда тўхтатилган. Шунингдек, ушбу автомобиль кўздан кечирилган.
Натижада, транспорт воситасининг юкхонасида қиймати 401,3 миллион сўмлик 16 минг 560 дона чўғланма лампалар ҳамда 225 дона маиший техника буюмлари борлиги аниқланган. Ҳозирда мазкур ҳолат юзасидан божхона органлари томонидан суриштирув ҳаракатлари олиб борилмоқда.
Аввалроқ Тошкентда 11 миллион сўмлик буюмларни Ўзбекистонга ноқонуний олиб кирмоқчи бўлган шахс ушлангани ва Бувайдада машинасида ҳеч қандай ҳужжати бўлмаган 20,2 млн сўмлик телевизорларни олиб кетаётган ҳайдовчи ушлангани ҳақида хабар қилинганди. Шунингдек, Наманган шаҳрида машина юкхонасида 900 дона кучли таъсир қилувчи дорини олиб кетаётган ҳайдовчи қўлга олингани ҳақида хабар берилганди.
