Самарқанд яқинида йўлнинг бир қисми ўпирилиб тушди

Фото: kun.uz

Хабарга кўра, 6 май куни соат 20:40 атрофида М39 Алмати — Тошкент — Термиз халқаро автомобил йўлининг Самарқанд вилояти ҳудудидан ўтувчи 1081-километрида, йўлнинг тагидан ўтган 1 200 миллиметрли юқори босимли магистрал сув қувури ёрилиб кетган. Оқибатда, катта миқдорда сув сизиб чиқиб, йўлнинг чап томонидан 15х6 метр қисми ўпирилиб тушган. Яна бир қисми эса чўккан.

Қайд этилишича, вилоят ИИБ ЙҲХБ томонидан жойдаги айланма атрофида йўл қопламаси чўккан ва ўпирилиб тушган томонда транспорт воситаларининг ҳаракати тўхтатилган ҳамда йўлнинг иккинчи томонидан қатнов ташкил этилган.

Таъкидланишича, ҳодиса оқибатларини бартараф этиш учун:

• Вилоят ИИБ ЙҲХБдан 18 нафар,
• ППХдан 8 нафар,
• Йўл ташкилотидан 25 нафар,
• «Самарқанд сув таъминоти» МЧЖдан 27 нафар ходим жалб қилинган.

Шунингдек, 2 та трейлер, 2 та автокран, 2 та экскаватор, 1 та погрузчик, 1 та манипулятор, 2та сув торткич ва 2та махсус машина жалб этилган. Мазкур ҳодисада ҳеч ким жароҳат олмаган. Айни дамда йўлнинг чўккан ва ўпирилган жойи ёпиб қўйилиб, қатнов йўлнинг нариги тарафидан ташкил этилган.