Степан Масленников Orient Group’нинг чакана савдо йўналишига бошчилик қилди

Orient Group компанияси Степан Масленниковнинг Макро супермаркетлар тармоғининг в.в.б. ижрочи директори этиб тайинланганлиги ҳақида эълон қилади.

Топ-менежернинг масъулияти соҳасига Home Market ва Profit Store ҳам киради. Бу лавозимда у Orient компаниялар гуруҳидан ташқарида фаолиятини давом эттиришга қарор қилган Роман Сайфулиннинг ўрнини эгаллайди.

Orient Group Management бош директори Андрей Сафронюк: «Роман ўз фаолияти давомида чакана савдо тармоғига янги технологияларни жорий этиш бўйича кўп ишларни амалга оширди. Унинг қўл остида Макро бизнес-жараёнларни ривожлантиришда олдинга силжиб, Ўзбекистон ҳудудларига ҳам кенгайишни бошлади. Orient Group номидан Романга лойиҳаларини амалга оширишда муваффақиятлар тилаб қоламан. Ишончим комилки, Степан Масленниковнинг катта бошқарув тажрибаси унга холдингнинг энг муҳим йўналишидаги бозор позицияларини мустаҳкамлашга эътибор қаратган ҳолда ҳозирги жамоани сақлаб қолиш ва мустаҳкамлаш имконини беради».

Orient Group компаниясининг Чакана савдо соҳасидаги энг йирик активи Makro супермаркетлар тармоғидир. Бозорнинг сўзсиз етакчиларидан бири бўлган ушбу тармоқ 2010-йилдан буён фаолият юритиб келмоқда, Ўзбекистоннинг барча ҳудудларида 100 дан ортиқ дўконлари мавжуд бўлиб, минглаб одамларни иш билан таъминлаган.

Воқеани шарҳлар экан, Степан Масленников шундай деди: «Ишончим комилки, чакана савдодаги муваффақиятнинг энг муҳим омили бу ишончдир. Гап фақатгина бренднинг мижозлар билан йиллар давомида барқарор маҳсулот ва хизмат сифати асосида қурилган ишончли муносабатлари ҳақида эмас. Худди шундай муҳим элемент бу ходимларнинг танланган стратегиянинг тўғрилигига ва компания бошқарувига бўлган ишончидир. Ўз навбатида, мен жамоавий руҳни мустаҳкамлаш ва интенсив ривожланиш векторини белгилаш учун қўлимдан келганини бажараман – бу ходимларни ўзига жалб эта олади ва илҳомлантиради. Фақат шундагина биз истеъмолчилар ишончига умид қилишимиз мумкин».

Степан Масленников – ташкилий ўзгаришлар, стратегик ва лойиҳаларни бошқариш, бизнесни ривожлантириш ва инвестициялар бўйича халқаро тажрибага эга эксперт. Orient Group жамоасига қўшилишидан олдин Степан Tyumen Oil Company ва British Petroleum компанияларининг интеграциялашувидан ўтган. У Қозоғистоннинг энг йирик нефть компанияси – KazMunayGaz’ни трансформация дастурини амалга оширишда иштирок этган. У йирик хусусий компаниялар ва молиявий ва саноат холдинглари бизнесидаги стратегик ўзгаришларга раҳбарлик қилди. 2020- йилдан эса – Orient Group Management Трансформация департаменти директори, холдинг стратегиясини шакллантириш ва амалга ошириш учун масъул.