АҚШ сенатида собиқ президент Трамп устидан суд бошланди
АҚШ сенатида собиқ президент Трамп устидан суд бошланади. У ўз тарафдорларини қонли ғалаёнга ундаганликда айбланмоқда. Бу ҳақда Еuroasia хабар берди.
Фото: Championat.com
Маълум бўлишича, Трамп айбдор деб топилиши учун сенаторларнинг камида учдан икки қисми импичментни ёқлаб овоз бериши керак. Бунинг учун айбловга барча демократлардан ташқари яна камида 17 республикачи қўшилиши лозим.
«Трамп айбдор деб топилса нима бўлади?
Деярли ҳеч нарса. Агар у президент бўлганда, ишидан ҳайдалган бўларди. У аллақачон президентликдан кетган экан, айбловнинг тасдиқланиши кўпроқ рамзий маънога эга», — дейилади хабарда.
Таъкидланишича, ғалаёнга ундагани учун сенаторлар томонидан Трамп айбдор деб топилиши уни қамоққа олинишини англатмайди. Бу нарса суд томонидан амалга оширилиши керак. Сенатнинг айблов қарори автоматик тарзда жиноий иш очилишини ҳам англатмайди.
Хабарга кўра, Конгресс амалга ошириши мумкин бўлган ягона нарса – Трампнинг келгуси сайловларда қатнашишини тақиқловчи алоҳида бир қарор чиқариши. Бу қарор учун шунчаки кўпчиликнинг овози кифоя қилади.
Шунингдек, сенатдаги муҳокама камида бир ҳафта давом этади ва охирида Трампни айбдор деб топиш ёки топмаслик масаласи овозга қўйилади.
