«Бу ғоялар остида Ўзбекистонга ёмонлик ётибди». Алишер Қодиров автомобиль импорти ҳақидаги таклифга муносабат билдирди

«Миллий тикланиш» партияси фракцияси раҳбари Алишер Қодиров Монополияга қарши курашиш қўмитаси раисининг биринчи ўринбосари Бобир Каримовнинг «UzAuto Motors» монополиясига қарши курашиш ҳақидаги фикрларига муносабат билдирди, деб хабар берди «Газета.uz»

Фото: «Upl.uz»

Алишер Қодиров Жаҳон савдо ташкилотига аъзолик орқали рақобат муҳитини шакллантиришга тайёргарлик кўрилаётганини таъкидлаган. «Шу фикрга келиш учун шунча шовқин, шунча популизм… Кимлардир машҳурроқ бўлгандир, Ўзбекистон ютмади», — дейди у.

Унинг сўзларига кўра, хориждан автомобиль олиб келишни таклиф қилаётган «халқпарвар»лар нафақат сиёсатни, балки иқтисодиётни ҳам тушунмайди:

«Минтақада автосаноатни шакллантириш учун озмунча меҳнат қилинмади. Бизнес талаблари ўз вақтида бу лойиҳани фойда келтирмайди, деб ҳисоблаган. Тўлов қобилияти паст бўлган давлатларда автосаноат яшаб кетолмайди. Автосаноат давлатларни ҳам иқтисодий, ҳам сиёсий, ҳам интеллектуал кучли қиладиган тармоқ. Кучли давлатлар бу тармоқни инқироз пайтларида бекорга қўллаб-қувватлашмайди.

Масалан, Россияда энг оғир иқтисодий инқироз ҳолатида ҳам «АвтоВАЗ» йўқ қилиб юборилмади. Буни тушунган тушунади. Ўзбекистонда автосаноатни йўқ қилиб, хориждан автомобиль олиб келишни йўлга қўйишни ‘халқпарвар’ таклиф сифатида илгари сурганлар нафақат сиёсатни, балки иқтисодни ҳам тушунмаса керак», — деди қуйи палата спикери ўринбосари.

Шунингдек, у: «Одамларга яхшилик қилаётгандек кўринаётган бу ғоялар остида Ўзбекистонга ёмонлик ётибди. Дунёни қаерида яшасам ҳам қорним тўқ бўлса бўлди, деб яшайдиган космополитик қараш эгаларига бу масала, албатта, кулгилидир. Ўзбекистондаги монополияларнинг ҳаммаси, жумладан, ‘UzAuto Motors’ ҳам Ўзбекистон Жаҳон савдо ташкилотига аъзо бўлганидан кейинги очиқ ва кучли рақобатга тайёр бўлиши керак.», — дея қўшимча қилган.

Эслатиб ўтамиз, Монополияга қарши курашиш қўмитаси раисининг биринчи ўринбосари Бобир Каримов «UzAuto Motors» томонидан нархларни асоссиз оширилишини тўхтатиш ҳақида фикр билдирган эди.

Аввалроқ «UzAuto Motors» автомобиллар нархини пасайтириш имконсиз эканлигини маълум қилганди. Бундан ташқари «UzAuto Motors» Монополияга қарши курашиш қўмитасининг қарори устидан судга шикоят қилган эди.

Шунингдек, Монополияга қарши курашиш қўмитаси «UzAuto Motors»га қарши судда ютқазгани, «UzAuto Motors» 2020 йил давомида давлат бюджетига миллиардлаб пул тўламагани ва Бош прокуратура «UzAuto Motors»га нисбатан жиноий иш очишни рад этгани хабар қилинганди.