«Жуда кўп ҳолатларда одамларга раҳмим келган». Озодбек Назарбеков ихчам тўйлар тарафдори эканини айтди

Маданият вазири Озодбек Назарбеков фуқаро сифатида ихчам тўйлар тарафдори эканини айтиб, халқ орасида катта тўй қилиш бир мажбуриятдек қабул қилиниб, аллақачон шаклланиб бўлганини таъкидлаган.

Фото: «Tez News»

Озодбек Назарбеков беш йил Россияда юриб, қора меҳнат қилиб, ўша ерда касал орттириб, лекин топганини бир кунлик тўйда йўқ қилиш ва ишлагани яна хорижга кетиш ҳолатларига шахсан гувоҳ бўлганини таъкидлаб, фуқаро сифатида ихчам тўй тарафдори эканини айтган:

«Катта-катта тўйхоналар кафе ёки ресторанга айлантирилиб, фаолиятини бемалол давом эттирса ҳам бўлади. Шахсан мен фуқаро сифатида ихчам тўйларни қўллаб-қувватлайман. Чунки ўзим бу соҳада анча вақт юрганман, жуда кўп ҳолатларда одамларга раҳмим келган. Беш йил Россияда юриб, қора меҳнат қилиб, ўша ерда касал орттириб, лекин топганини бир кунлик тўйда йўқ қилиш ва ишлагани яна хорижга кетиш ҳолатларига шахсан гувоҳ бўлганман».

Унинг сўзларига кўра, хақл орасида катта тўй қилиш бир мажбуриятдек қабул қилиниб, аллақачон шаклланиб бўлган.

«Халқимиз орасида катта тўй қилиш бир мажбуриятдек қабул қилиниб, аллақачон шаклланиб бўлган. Ақлан олиб қаралса, бу мажбурият эмас. Қурби етмаса ҳам қарз олиб, дабдабали тўй қилгандан кўра, одамлар топган пулини фарзандларини ўқитишга, илм олишига ва шу каби нарсаларга йўналтирса, ўйлайманки, ўзлари учун ҳам, жамиятимиз учун ҳам фойдали бўлади.

Миллий ғояни шакллантириш биргина давлатнинг ўзини қўлидан келмайди. Миллий ғояни халқ, аниқроғи, давлат ва жамият биргаликда шакллантиради. Бунинг учун эса фақатгина илм олишимиз керак, назаримда», — дейди у.

Шунингдек, вазир бизда қилинган қилинган тўйларни дунёда ҳали ҳеч ким қилмаганини алоҳида қайд этган:

«Роса ўйнаб-кулдик, катта-катта тўйлар қилдик, тўйларимизда ҳатто вертолёт ҳам ишлатиб кўрдик — ҳамма нарса қилиб кўрдик. Бизда қилинган тўйларни дунёда ҳали ҳеч ким қилгани йўқ, энг юқориларини ҳам қилдик. Бундан буёғига фақат дабдабали тўй ўтказишга эмас, балки илм-фанга кўпроқ аҳамият берсак, халқимиз ҳам буни тўғри тушуниб, топган ортиқча сармоясини фарзандининг илми учун сарфласа, менимча, тўғри бўлади».