Ўқувчилари мактабга эшакда қатнаган Чимбой ҳокими «Equinox» сотиб олишни бекор қилди

Ўқувчилар 8 километр узоқликдаги мактабга эшакда қатнаган Чимбой тумани ҳокими «Equinox» харид қилишни бекор қилди. Бу ҳақда «Kun.uz» хабар берди.

Фото: Авто.ру

Маълум қилинишича, Чимбой тумани ҳокими лавозимига тайинланган Айбек Тажетдинов хизматда фойдаланиш учун «Equinox» автомобилини харид қилаётгани ҳақида хабар берилган. Чимбой тумани матбуот котибининг айтишича, «Equinox» хариди бекор қилинган. Ҳеч қандай пул ҳам ўтказилмаган. Ҳоким ҳозирда ўзининг аввалги «Captiva»сида юрибди, деб қўшимча қилган Толибоева Наргиза.

Маълумот учун, Aввал Вазирлар Кенгаши раисининг биринчи ўринбосари лавозимида, ҳозир эса Чимбой тумани ҳокими бўлган Айбек Тажетдинов «UzAuto Motors» компанияси томонидан ишлаб чиқарилган «Equinox» русумли машинани 349 млн сўмга сотиб олиш бўйича шартномани 2020 йилнинг 21 декабр куни имзолаган. Шартнома муддати 10 кун қилиб кўрсатилган. Aммо Чимбой тумани ҳокимлиги бош ҳисобчиси Жиемуратов Захаратдиннинг таъкидлашича, шартнома тўлиқ бекор қилинган. Шартномада кўрсатилган пул ҳам ўтказилмаган.

Аввалроқ Қўшработ ва Нарпай ҳокимлари салкам 400 миллион сўмга хизмат автомобиллари харид қилгани ҳақида хабар берилганди.