Ўзбекистонда 5 ёшдан 11 ёшгача бўлган болалар ҳам коронавирусга қарши эмланади

Ўзбекистонда 5 ёшдан 11 ёшгача бўлган болалар ҳам коронавирусга қарши эмланади. Бу ҳақда АКОАда 20 январь куни ўтказилган брифингда Санитария-эпидемиология назорати давлат инспекцияси бошлиғи ўринбосари Нурмат Отабеков маълум қилди.

Қайд этилишича, 21 сентябрдан 12 ёшдан 18 ёшгача бўлган болаларни «Pfizer» вакцинаси билан эмлаш бошланган эди. Натижада ҳозиргача шу ёш тоифасига мансуб салкам 800 минг нафар аҳоли эмланди.

«Эндиликда мамлакатимизда 5–11 ёшли болаларни эмлаш бўйича алоҳида кўрсатма тайёрланди. Улар ‘Pfizer’ вакцинасининг 0,1 мл литр дозаси билан эмланади. Бунда 6 дозали вакцинани самарали ишлатиш учун бир пайтнинг ўзида эмлаш пунктларига 18–20 нафар болани йиғиб, вакцинани қўллаш назарда тутилган. COVID’га қарши эмланадиганлар сони энди 5 ёшдан юқори аҳоли статистикаси билан юритилади», — деди Санитария-эпидемиология назорати давлат инспекцияси бошлиғи ўринбосари.

Нурмат Отабековнинг сўзларига кўра, давлат ташкилотларида 50 мингдан кўп, хўжалик юритиш субъектларида 20 мингдан кўп эмланмаган фуқаро мавжуд. Шунингдек, у ташкилотларлаги ходимларни ҳам эмлаш жараёнига жалб этиш жоизлигини таъкидлади.