Хоразмда туғилмаган боласини сотмоқчи бўлган никоҳсиз ота-она ушланди
Хоразм вилояти Урганч туманида никоҳсиз яшаб келаётган жуфтлик туғилмаган 4 ойлик боласини сотмоқчи бўлди. Бу ҳақда Ички ишлар вазирлигининг «Постда» нашри хабар берди.
Қайд этилишича, Урганч туманидаги Бекобод қишлоғида яшовчи П.К. никоҳсиз яшаётган турмуш ўртоғи билан жиноий тил бириктирган. Улар ҳали туғилмаган 4 ойлик фарзандига харидор излаб, ҳазорасплик Т. Б. Билан келган. 4 ойлик ҳомила туғилгандан сўнг олиш шарти билан 9000 АҚШ долларига баҳоланган. П.К. турмуш ўртоғи билан келишилган пулнинг 6000 АҚШ долларини олаётган пайтида ашёвий-далиллар билан қўлга олинган.
Ҳозирда ушбу ҳолат юзасидан жиноят иши қўзғатилган.
Аввалроқ Фарғонада бир ёшли фарзандини 1500 долларга сотмоқчи бўлган аёл ушлангани маълум қилинган эди. Бундан ташқари, Сурхондарёда аёл 2 ойлик чақалоғини 2 минг долларга сотмоқчи бўлган.