Ўзбекистонда байрам кунлари тиббиёт муассасалари қандай тартибда фаолият кўрсатиши маълум бўлди
Ўзбекистонда байрам кунлари барча тиббиёт муассасаларида шифокор ва ўрта тиббиёт ходимларининг тегишли навбатчилик жадвали асосида фаолият юритади. Бу ҳақда Соғлиқни сақлаш вазирлиги матбиот хизмат маълум қилди.
Фото: «Tez News»
Хабар қилинишича, 2369 та амбулатория-поликлиника муассасалари ҳамда туман, вилоят ва республика миқёсидаги барча шифохоналар, ихтисослаштирилган илмий-амалий тиббиёт марказлари, тиббиёт олий ўқув юртлари клиникаларида тиббиёт ходимлари навбатчилик асосида аҳолига хизмат кўрсатади.
Шунингдек, шошилинч тиббий ёрдам шифохоналари ва тез ёрдам хизмати одатдаги тартибда ишлайди. Жумладан, Республика шошилинч тиббий ёрдам илмий маркази, унинг ҳудудларда 13 та филиали, туман ва шаҳар тиббиёт бирлашмалари тизимидаги барча бўлимлари фаолият кўрсатади.
Республика бўйича ҳудудларда 14 та Call-марказ туну кун иш режимида бўлиб, тез ёрдам тизимида мавжуд 2748 та бригада таркибидаги жами 12 837 нафар шифокор ва 27 653 нафар ўрта тиббиёт ходимлари навбатчилик асосида аҳолига малакали тиббий ёрдам кўрсатади.
Бундан ташқари, байрам кунлари 219 та туғруқ муассасалари ҳам узлуксиз фаолият кўрсатади. Жумладан, 31 декабрдан 1 январгача бир сутка давомида 583 нафар акушер-гинеколог, 344 нафар неонатолог, 1172 нафар доя ҳамда 2042 нафар ҳамшира оналар ва болалар саломатлиги йўлида хизмат кўрсатишади. Байрамнинг кейинги кунлари ҳам яна шунчадан тиббиёт ходимлари навбатчиликка киришади.
Аввалроқ Ўзбекистонда байрам кунлари жамоат транспортлари ҳаракатланиш тартибига аниқлик киритилгани хабар қилинганди.
