Ўзбекистондан Россияга жўнатилган қуруқ меваларда заҳарли зараркунанда аниқланди

Ўзбекистондан Россияга олиб борилган 1 тонна қуруқ ўрикда заҳарли зараркунанда аниқланди. Бу ҳақда Россиянинг Ветеринария ва фитосанитария назорати бўйича федерал хизмати хабар берди.

Фото: «Agronet.uz»

Федерал хизмат хабарига кўра, Ўзбекистондан етиб борган 1 тонна қуритилган ўриклар орасида карантин аҳамиятига эга бўлган зарарли организм, яъни капр қўнғизи (Trogoderma granarium Ev.) аниқланган.

Ушбу партия Россия фитосанитария талабларига мувофиқлигини тасдиқловчи сертификат билан Россияга олиб кирилган. Капр қўнғизи Ўзбекистонда расмий равишда йўқ қилинган организм ҳисобланади.

Капр қўнғизи кўплаб мамлакатларда карантин аҳамиятига эга организмлар рўйхатига киритилган бўлиб, у захирадаги маҳсулотларнинг 70 фоизини йўқ қилишга қодир. Россия ветеринария ва фитосанитария назорати бўйича федерал хизмати Ўзбекистондан қуритилган мевалар ва ёнғоқларни олиб киришни тақиқлаш ҳуқуқини ўзида сақлаб қолиши ҳақида хабар берган.

Аввалроқ Россия ветеренария ва фитосанитария назорати федерал хизмати 26 ноябрдан бошлаб Фарғона вилоятидан олиб келинадиган помидор ва қалампир маҳсулотларига тақиқ қўйгани ҳақида хабар берилганди. Шунингдек, Ўздавкарантин инспекцияси Россияда тақиққа учраган Ўзбекистон помидор ва булғор қалампир маҳсулотларини ўрганишни бошлаганини маълум қилган.