Ўзбекистонда 9 ой давомида фуқаролар фойдасига 9,3 млрд сўм ундирилди
Ўзбекистонда жами 9 млрд сўмдан ортиқ маблағ фуқаролар фойдаси учун ундирилди. Бу ҳақда Олий Мажлиснинг Инсон ҳуқуқлари бўйича вакилининг 9 ойлик фаолияти маълумотида билдирилди.
Жами мурожаатларнинг 27,3% иқтисодий, 24% ижтимоий, 16,4% шахсий, 11,8% мурожаат этиш, 3,7% оила ҳуқуқларига, 1% экологик ҳуқуқларга, 11,9 % ҳаракатланиш эркинлиги чекланган шахслар сақланадиган жойларда ушлаб турилган шахсларнинг ҳуқуқ ва қонуний манфаатларини таъминлашга ва 3,9% бошқа масалаларга оид.
Мурожаатлар ҳудудлар кесимида аҳоли сонидан келиб чиқиб таҳлил қилинганда энг кўп масалалар Қашқадарё, Сурхондарё вилоятлари ва Тошкент шаҳрига тўғри келиши аниқланган.
Ҳисобот даврида Омбудсман томонидан фуқароларнинг бузилган ҳуқуқларини тиклаш юзасидан давлат ташкилотлари ёки мансабдор шахсларга 133 та даъво ариза, тақдимнома, талабнома, огоҳлантириш ва хулоса шаклидаги таъсир чоралари киритилган ва уларнинг аксариятиижобий ҳал этилган.
Омбудсман томонидан фуқароларнинг мурожаатлари асосида ундиришга ҳамда ундириш белгиланишига кўмаклашилган жами маблағлар 9 млрд 327 млн сўмдан ортиқ сўмни ташкил этди. Шундан, 2 млрд 162 млн сўмдан ортиғи фуқароларнинг иш ҳақи ва меҳнат муносабатларига оид, — дейилади хабарда.
Фуқароларнинг қарздорлиги, соғлиғига етказилган зарарлар, моддий ва маънавий зарарлар ҳамда бошқа мажбурий тўловлар оқибатида юзага келган ҳуқуқий муносабатлар билан боғлиқ мурожаатлар ўрганилиши натижасида жами 2 млрд 623 млн сўмдан ортиқ маблағлар фуқаролар фойдасига ундирилишига кўмаклашилди.
Шунингдек, 25 нафар фуқаронинг ишга тиклаш ва ишга жойлаштириш бўйича мурожаатлари ижобий ҳал қилинган, 11 та ҳолатда иш берувчининг ходимга нисбатан ноқонуний хатти-ҳаракатлари бартараф этилган. Давлат меҳнат инспекцияси инспекторлари томонидан Омбудсманнинг фуқаролар манфаатларида йўллаган сўровига асосан судларга салкам 20 та даъво аризалар киритилган.
Омбудсман сўровига асосан, хотин-қизларнинг вояга етмаган фарзандлари таъминоти учун 577 млн сўмдан ортиқ алимент тўловлари ундирилиши таъминланган.
Ер участкалари давлат ва жамоат эҳтиёжи учун олиб қўйилиши муносабати билан компенсация тариқасида тўланиши лозим бўлган 3,6 млрд сўмдан ортиқ маблағнинг фуқаролар фойдасига ундирилишида ёрдамлашилган. Фуқароларнинг салкам 56 млн сўмлик нореал қарздорликларининг бартараф этилиши таъминланди.
Шу билан бирга, мурожаатларни ўрганиш натижаларига кўра, инсон ҳуқуқларини бузилишига йўл қўйган 33 нафар масъул ходим хайфсан, жарима, лавозимидан озод этиш каби интизомий ва маъмурий жавобгарликка тортилган
