Германиянинг уч жойидан портловчи модда аниқланди
Германияда озиқ-овқат ва ичимлик ишлаб чиқарадиган учта йирик компанияда бомба топилган. Бу ҳақда ЎзА хабар берди.
Хабарга кўра, Мюнхен аэропортидаги почта тарқатиш марказида топилган портловчи модда полиция томонидан зудлик билан зарарсизлантирилди. Жўнатма Бавария озиқ-овқат дўконига юборилгани аниқланган.
Таъкидланишича, иккинчи бомба манзили мамлакатдаги энг катта супермаркетлардан бири бўлиши кўзда тутилган эди. Бироқ муддатидан олдин енгил портлаш содир бўлиб, уч нафар ишчи жароҳат олган. Жабрланганлар дарҳол касалхонага етказилган.
Шу билан бирга, учинчи портловчи модда Баден-Вюртемберг жануби-ғарбий минтақасида жойлашган Эппехаймдаги ичимлик дўконидан чиққан. Юк халтани очиб қараган ходим кучсиз портлашдан чўчиб кетган. Воқеа натижасида ҳеч ким шикастланмаган.
Тахминларга кўра, жўнатмалар ўртасида боғлиқлик мавжудлиги айтилмоқда. Фақат учала почта ҳам озиқ-овқат дўконига юборилгани сабаби номаълумлиги таъкидланган.
Ҳолат бўйича тергов ишлари олиб борилмоқда.
