Ўзбекистонда божхона органларига қабул қилинганлар мажбурий қайта тайёргарликдан ўтади

Президент томонидан имзоланган қонун билан «Давлат божхона хизмати тўғрисида»ги ҳужжатга қўшимча ва ўзгартишлар киритилди.

Киритилган ўзгаришларга кўра, божхона органларининг:

  • жиноий фаолиятдан олинган даромадларни легаллаштиришга, терроризмни ва оммавий қирғин қуролини тарқатишни молиялаштиришга қарши курашиш бўйича чора-тадбирларни ишлаб чиқиш ҳамда амалга оширишда иштирок этиши;
  • жисмоний ва юридик шахсларга қонунчиликда белгиланган тартибда пулли хизматлар кўрсатиш ҳуқуқига эга экани;
  • божхона назоратини амалга оширишда махсус восита сифатида хизмат итларидан фойдаланиши мумкинлиги белгиланди.

Божхона органларида лавозим ва уларга мувофиқ махсус унвонлар қўмита раиси томонидан тасдиқланади. Шунингдек, органларга қабул қилинган ходимлар мажбурий тартибда бирламчи касбий қайта тайёргарликдан ўтади.

Содир этган жинояти учун илгари ҳукм қилинган фуқаролар қўлланган жазо туридан, судланганлик ҳолати тугатилганидан ёки олиб ташланганидан қатъи назар, божхона органларига хизматга қабул қилинмайди.

Давлат божхона қўмитаси раисининг буйруғи билан Ўзбекистон ёки чет давлатнинг ОТМ ва ташкилотларига магистратура мутахассисликлари бўйича ўқишга юборилган божхона органи ходими ўқиш даврида охирги эгаллаган лавозимидагидан кам бўлмаган миқдорда пул таъминоти сақланган ҳолда божхона органларининг ихтиёрида қолдирилади.

Янгиликлар