Бухорода эркак хотинини кўкрак қафасига пичоқ уриб ўлдирди
Бухоро вилояти Ғиждувон туманида эркак 27 ноябрь куни хотинини кўкрак қафасига пичоқ уриб ўлдирди.
Маълум қилинишича, тахминан соат 12:00 да туманнинг Зарангари маҳалласида яшаган,1975 йилда туғилган Р.З. турмуш ўртоғи 1978 йилда туғилган Р.Н. билан жанжаллашиб қолган. Жанжал вақтида Р.З. ўз аёлининг чап кўкрак қафаси юқори қисмига ошхона пичоғи билан бир маротаба уриб, оғир тан жароҳати етказди. Оқибатда аёл вафот этган.
Суд-тиббий экспертизанинг дастлабки маълумотига кўра, марҳума Р.Н. ўткир санчиб кесувчи жисм таъсирида чап кўкрак юқори қисмидан олган жароҳати оқибатида келиб чиққан ўткир ички ва ташқи қон кетиши оқибатида вафот этгани аниқланган.
Ҳолат юзасидан судга оид тиббий, криминалистика ҳамда биология экспертизалари тайинланган бўлиб, туман прокуратураси томонидан фуқаро Р.З.га нисбатан Жиноят кодексининг 97-моддаси (қасддан одам ўлдириш) 1-қисми билан жиноят иши қўзғатилган ва гумон қилинувчи тегишли тартибда ушланган.
