Трамп молиявий ҳужжатларни соҳталаштиришда айбдор деб топилди

Нью-Йорк суд ҳайъати азолари АҚШнинг собиқ президенти Доналд Трампни «Trump Organization» компанияси молиявий ҳужжатларини қалбакилаштиришда ва порноактриса Сторми Даниелсга пул тўлашда айбдор деб топди. Бу ҳақда «ТАСС» хабар бермоқда.

Аниқлик киритилишича, Трамп барча 34 та банд бўйича айбдор деб топилган. У АҚШ тарихида суд ҳайъати азолари томонидан жиноят содир этганликда айбланган биринчи собиқ президент бўлди.

Судья ҳукми 11 июль куни эълон қилинади. Бу Трампнинг бир неча йилга қамалишига олиб келиши мумкин.
Трамп оз навбатида айбсизлигини яна бир бор таъкидлаб, ҳукмни шармандалик деб атади.

Эслатиб ўтамиз, АҚШнинг собиқ президентига нисбатан тергов бошланишига 2018 йил январь ойида «The Wall Street Journal» нашрида чоп этилган мақола сабаб бўлган. Мақолага кўра, Трамп 2016 йилги президентлик сайловларида ғалаба қозонганидан бир ой олдин адвокати Майкл Коэн порноактриса Дениелсга Трамп билан аввалги муносабатлари ҳақида маълумот тарқатмаслиги эвазига 130 минг доллар тўлаган.