ЎФА Фарғонада Про-лиганинг ҳал қилувчи ўйинида ҳакамнинг калтакланиши юзасидан баёнот берди

Ўзбекистон футбол ассоциатцияси Фарғонада Про-лиганинг ҳал қилувчи ўйинида ҳакамнинг калтакланиши юзасидан расмий баёнот берди.

Маълум қилинишича, 1 декабрь куни Фарғона шаҳрида Про лиганинг 20-туридан ўрин олган «Нефтчи» (Фарғона) – «Турон» (Яйпан) учрашуви бўлиб ўтган. Фарғона шаҳридаги «Истиқлол» стадионида ўтган мазкур баҳснинг якунида учрашув ҳакамларига нисбатан қўпол ва тажовузкор муносабатда бўлиниб, уларга тан жароҳати етказилган.

Мазкур ҳолат бўйича ЎФА мутахассисларидан иборат махсус ишчи гуруҳ тузилган ва Фарғонага етиб борган. У ерда Ички ишлар вазирлиги ҳамда «Нефтчи» – «Турон» учрашувининг ташкилий ишларига масъул барча ташкилотлар билан ҳамкорликда мазкур учрашув якунида юзага келган можаро бўйича суриштирув ишлари бошланган.

Таъкидланишича, бунда ҳакамларнинг фаолияти, иккала жамоа футболчилари ва мураббийларнинг ҳамда томошабинларнинг ҳатти-ҳаракатлари синчковлик билан ўрганиб чиқилмоқда. Яқин вақт ичида суриштирув ишлари якунига кўра қўшимча маълумот берилади.

Саълумот учун, Шавкат Насибуллаев футболчи ва мухлислар томонидан калтаклангани хабар қилинган эди. Вилоят Ички ишлар бошқармаси мазкур шахсларга нисбатан жиноят иши қўзғатилганини маълум қилган. Мазкур жиноят иши доирасида 6 нафар шахс гумон қилинувчи тариқасида иштирок этишга жалб қилиниб, улар Жиноят-процессуал кодексининг 221-моддаси тартибида ушланган.