Тошкентда «Ҳизб ут-Таҳрир» аъзоларининг фаолиятига чек қўйилди
Тошкентда «Ҳизб ут-Таҳрир» экстремистик ташкилоти аъзоларининг фаолиятига чек қўйилди.
Маълум бўлишича, ҳуқуқни муҳофаза қилиш идоралари томонидан тезкор тадбирлар ўтказилган. Натижада Олмазор ва Шайхонтохур туманларида истиқомат қилувчи фаолияти тақиқланган «Ҳизб ут-Таҳрир» экстремистик ташкилоти аъзоларининг фаолиятига чек қўйилди.
Ушбу жиноий гуруҳнинг фаол аъзоси бўлган И.А 10 нафардан ортиқ синфдошларини Telegram’да ташкил қилган «Чойхона» ва «Иймонлашайлик» гуруҳларига қўшиб, тақиқланган материалларни тарқатиб келган. Шунингдек, у яқинлари ва кўплаб танишларини «таҳрирчилар» сафига аъзо бўлишга даъват қилиб, интернет орқали экстремистик мазмундаги аудио ва видео материалларни тарғиб қилган.
Ўз навбатида гуруҳ аъзолари мазкур материаллар билан танишиб, «Ҳизб ут-Таҳрир» ДЭТ фаолиятини қўллаб-қувватлаб келишган. Мазкур жиноий гуруҳ Польшада яшириниб келаётган «Ҳизб ут-Таҳрир»нинг ғоявий етакчиларидан бири Маҳмуд Абдулмўмин тахаллусли 1980 йилда Қирғизистонда туғилган, халқаро қидирувда бўлган Холдаров Махмуд Абдумаликович томонидан бошқарилган.
