Ўзбекистонда чартер рейслар субсидияланади
Ўзбекистонга келувчи хорижий сайёҳлар оқимини ошириш мақсадида туроператор ва авиаташувчиларнинг мамлакатга ташкил этган чартер рейслари ҳар бир йўловчи сонидан келиб чиққан ҳолда субсидияланади. Бу ҳақда Давлат туризм қўмитаси «TezNews»га маълум қилди.
Маълум қилинишича, субсидия миқдорлари 20 февралдан 19 нобяргача бўлган чартер рейсларга ҳар бир йўловчи учун — 20 долларни, 20 ноябрдан 19 февралгача бўлган чартер рейсларга ҳар бир йўловчи учун 50 долларни ташкил қилади.
Субсидия олиш учун қуйидаги шартлар қўйилади:
- чет эл фуқаролари ёки фуқаролиги бўлмаган шахслар учун икки томонлама (Ўзбекистонга ва ундан) чартер рейс ташкил қилиш;
- чартер рейс билан ташриф буюрган йўловчилар Ўзбекистондаги жойлаштириш воситаларида камида беш кунча тунаб қолиши;
- чартер рейслар ва ундаги йўловчилар тўғрисидаги маълумотларни республика аэрпортларига тўлиқ тақдим қилиш.
«Субсидия олиш учун туроператор ва авиаташувчилар Ўзбекистон Туризмни ривожлантириш давлат қўмитасига мурожаат қилади. Мурожаат аризасига йўловочи манифести нусхаси тақдим қилиниши лозим. Мурожаатлар ҳар чорак якуни билан ўтган чоракда амалга оширилган чартер рейслар бўйича тақдим қилинади», — дейилади хабарда.
Қўмита ҳар чорак якуни билан келиб тушган аризаларни кўриб чиқиб, чоракдан кейинги ойнинг 20 санасига қадар субсидиялар ажратилишини таъминлайди. Мурожаатларни ўрганиш учун қўшимча вақт талаб этилган тақдирда, уни кўриб чиқиш ва ўрганиш муддати қўшимча тарзда яна 10 кунга узайтирилиши мумкин.
Эслатиб ўтамиз, аввалроқ Ўзбекистон фуқароларини хориждан олиб келиш бўйича 9 август кунидаги чартер рейс эълон қилинган эди.
Шунингдек, Ўзбекистонда туроператорлар ташкил этадиган чартер рейсларнинг чипта нархлари нега қиммат эканлиги маълум қилинди.
