Давлат хизматлари марказлари орқали «бола пули» берилиши тўғрисидаги хабарга ойдинлик киритилди

Давлат хизматлари агентлиги матбуот хизмати сўнгги пайтларда давлат хизматлари марказларига «бола пул» жратилишини сўраб мурожаат қилаётган фуқаролар сони ортганлиги туфайли ушбу масала юзасидан тушунтириш берди.

Фото: « Tez News»

Қайд этилишича, кам таъминланган оилаларга ижтимоий нафақалар ва моддий ёрдам тайинлаш ва тўлаш масалалари Вазирлар Маҳкамасининг қарори билан тасдиқланган низом билан тартибга солинади. Низомга кўра, болали оилаларга нафақа, бола парвариши бўйича нафақа ва моддий ёрдам агар оиланинг ҳар бир аъзосига тўғри келадиган ўртача ойлик жами даромад миқдори белгиланган энг кам ойлик иш ҳақининг 1,5 баравардан ортиқ бўлмаса, тўланади.

Шунингдек, ариза берилгандан сўнг маҳаллада тузилган комиссия, ариза берилган санадан бошлаб уч кун муддатда, ариза берувчи томонидан тақдим этилган маълумотлар асосида оиланинг аъзосига тўғри келадиган ўртача ойлик жами даромад миқдорини аниқлайди. Оиланинг жами даромадига, оила аъзолари томонидан олинган қуйидаги даромадлар киритилади:

  • меҳнатга ҳақ тўлаш шаклидаги даромадлар;
  • мулкий даромадлар;
  • якка тартибдаги тадбиркорнинг даромади;
  • чет элда ишлайдиган ёки тадбиркорлик фаолиятини амалга ошираётган оила аъзоларидан пул тушумлари суммаси;
  • пенсиялар, стипендиялар ва нафақалар;
  • шахсий ёрдамчи (деҳқон) хўжалигини юритишдан олинган даромад;
  • Ўзбекистон Республикаси қонун ҳужжатларида белгиланган бошқа даромадлар.

Таъкидланишича, текшириш натижалари бўйича комиссия оиланинг моддий ва мулкий ҳолатини ўрганиш далолатномасини тузади. Тегишли нафақа ёки моддий ёрдамни тайинлаш бўйича хулоса далолатномада кўрсатилади. Болали оилаларга нафақа, бола парвариши бўйича нафақа ва моддий ёрдам комиссия қарори билан тайинланади.

Янгиликлар