Qirg‘izistonning sobiq muftiysi Chubak hoji Jalilov vafot etdi. U pnevmoniyaga chalingandi
Taniqli din arbobi, Qirg‘iziston sobiq muftiysi 45 yoshli Chubak hoji Jalilov 11-iyulga o‘tar kechasi Bishkekdagi Milliy kasalxonada vafot etdi, deya xabar bermoqda “24.kg” respublika muftiyatiga tayanib.
Foto: Cabar.asia
Qayd etilishicha, u bir kun avval pnevmoniya dastlabki tashxisi bilan kasalxonaga og‘ir ahvolda olib kelingan.
Janoza namozi sanitariya-epidemiologiya normalariga amal qilgan holda Bishkekda o‘tkazilgan bo‘lib, unda mamalakatning turli burchaklaridan minglab qirg‘izistonliklar ishtirok etgan.
Foto: “Sputnik”
Foto: “Sputnik”
Tashrif buyurganlarning barchasi niqobda, bir-birlaridan 1 metr masofa saqlagan holda turgan. Marhumga hech kim yaqinlashmagan, bunga ruxsat berilmagan.
Foto: Videodan lavha
O‘zbekiston Musulmonlari idorasi Qirgʻizistonlik din olimi Chubak hoji Jalilovning vafoti munosabati bilan ta’ziya bildirdi.
Ma’lumot uchun, Chubak hoji Jalilov 1975-yilda o‘qituvchilar oilasida tug‘ilgan. Islomiy bilimlarni Qirgʻiziston va Saudiya Arabistonidan olgan. 2008—2010-yillarda Qirgʻiziston musulmonlar idorasining fatvo boʻlimini boshqargan, 2010—2012-yillarda muftiy boʻlib ishlagan.
