Hаманганлик 2 ўқувчи бир вақтнинг ўзида 10 дан ортиқ олийгоҳларга ўқишга қабул қилинди
Наманган вилояти Учқўрғон туманида 6-ДИМИнинг 11-синфини тамомлаган Сайдулло Фазлиддинов бир вақтнинг ўзида халқаро ва республиканинг нуфузли 12 та олийгоҳига ва Наманган шаҳридаги 34-умумтаълим мактабининг 11-синф ўқувчиси Довудхон Алижонов 10 та хорижий ОТМга талабаликка қабул қилинди, деб хабар берди вилояти ҳокимлиги матбуот хизмати.
Фото: Наманган вилояти ҳокимлиги ахборот хизмати
Хабарда айтилишича, Сайдулло Фазлиддинов Ҳиндистон Шарда университети, Британия менежмент университети, Вебстер университети, Кембридж коллежи, Жанубий Корея университети, Латвия ИСМА университети, Марказий Осиё халқаро менежмент университети (International management University of Central Asia), Жанубий Корея ТЕАМ (ТEАМ) университети, Амити университети, Инха университети, (Management Development University of Singapore) MDIS университети, Акфа университетларига ҳужжат топширган ва имтиҳондан ўтган.
Айни пайтда кўплаб олийгоҳлар талабасига айланган Сайдулло «Кенгуру» халқаро математика танловида фаол иштирок этиб, сертификатни қўлга киритган. Қолаверса, шу йил октябрь ойида Австралияда ўтказиладиган математика олимпиадасининг финал босқичида ҳам иштирок этиш ҳуқуқини қўлга киритган, дейилади хабарда.
Фото: Наманган вилояти ҳокимлиги ахборот хизмати
Шу билан бирга, Наманган шаҳридаги 34-умумтаълим мактабининг 11-синф ўқувчиси Довудхон Алижонов эса бир вақтда 10 та хорижий ОТМ талабасига айланган. Вестминстер, Вебстер, Ҳиндистон Шарда, MDIS, Kорея ЁДЖУ университетлари ҳамда Кембридж халқаро коллежи шулар жумласидан.
Аввлроқ бухоролик ўқувчи бир пайтнинг ўзида Ўзбекистондаги 6 та хорижий олийгоҳга, андижонлик мактаб битирувчиси 8 та ҳамда бухоролик мактаб битирувчиси 20 та хорижий олийгоҳга талабаликка қабул қилингани ҳақида хабар берилганди.
