Тошкент метрополитени учун ўнта поезд сотиб олинади
Вазирлар Маҳкамасининг «Тошкент метрополитени учун ўнта тўрт вагонли метро поездларини харид қилиш» лойиҳасининг техник-иқтисодий асослашни тасдиқлаш тўғрисида»ги қарори қабул қилинди.
Хабарга кўра, «Ўзбекистон темир йўллари» АЖга Тошкент метрополитени учун «Метровагонмаш» АЖдан (Россия Федерацияси) тўрт вагонли метро поездларини 1 декабрга қадар олиб келиниши топширилди. Лойиҳа бўйича битим Тошкент шаҳрида 5-7 апрель кунлари ўтказилган ИННОПРОМ халқаро саноат кўргазмасида имзоланган.
Шунингдек, ҳужжат билан қуйидагилар тасдиқланди:
- Ўнта тўрт вагонли метро поездларини харид қилиш лойиҳасини ТИАнинг асосий техник- иқтисодий кўрсаткичлари;
- «ВЭБ.РФ» давлат ривожланиш корпорацияси банкининг кредити бўйича асосий қарзни қайтариш, фоизлар ва воситачилик ҳақини тўлашнинг прогноз жадвали;
- «Росэксимбанк» АЖ кредити бўйича асосий қарзни қайтариш, фоизлар ва воситачилик ҳақини тўлашнинг прогноз жадвали.
Таъкидланишича, лойиҳанинг ТИАга асосан:
- умумий қиймат (эквивалентда) 63,7 млн евро ни ташкил этади, ундан:
- 8,7 миллион евро – давлат бюджети маблағлари;
- 30,5 миллион евро – «ВЭБ.РФ» Россия давлат ривожланиш корпорациясининг кредити;
- 24,5 миллион евро –«Росэксимбанк» АЖ кредити.
