«Мамлакатда яширин иқтисодиётга қарши кураш бошланган» — ДСҚ раиси Шерзод Кудбиев

24 февраль куни буджетга тўланадиган солиқ суммаларини камайтириш ва ҚҚС суммаларини ноқонуний ҳисобга олиш муаммосига дуч келган тадбиркорлар гуруҳи билан Давлат солиқ қўмитаси раиси Шерзод Кудбиев учрашди. Бу ҳақда Gazeta.uz’га таяниб, Daryo хабар берди.

Таъкидланишича, мамлакатда «яширин иқтисодиёт»га қарши кураш бошланган ва «шубҳали» корхоналар фаолияти фаоллаштирилган.

Маълум бўлишича, 1 февраль ҳолатида ҚҚС бўйича ҳисобга олинган сумма 9,2 триллион сўмга етган, лекин бу давлатга шунча маблағ тўланганини англатмайди.

«9,2 триллион сўм ёлғон йўли билан тўланмагани натижасида… Майли, бу қандайдир қисми бўлиши мумкин — 1 триллион сўм, 2 триллион сўм ёки бошқа маблағ. Ҳозирда буни яхшилаб ўрганамиз», — дейди Шерзод Кудбиев.

Қайд этилишича, «бир кунлик фирмалар» умри сезиларли даражада қисқарган — эндиликда улар 300-400 миллион сўмлик «фиктив» битимларни амалга оширганидан сўнг, ёпилмоқда. Айрим фирмалар «давлатдан эмас, балки занжирдаги ҳар бир тадбиркордан ўғирлаб» 300 миллиард сўмлик ҳисоб-фактураларни расмийлаштирмоқда.

«Биз мана шунча қайтарамиз. Кеча битта фирма 300 миллиард сўмлик ҳисоб-фактурани расмийлаштирди. Кимни алдаяпмиз? Энди мен ушбу фирма бўйича камерал текширув ўтказишим керакми? Ўзбекистонда ниманинг нархи шунча бўлиши мумкин? Бу 30 миллион долларку. Сув омбори? Самолёт? Билмайман. Уч кун олдин пайдо бўлган фирма бу каби битимларни амалга ошира олмайди. Келинглар, бир-биримизни алдамайлик», — дейди ДСҚ раиси.

«Нақдлаштирувчилар — хусусий тадбиркорнинг биринчи ва ягона душмани. Улар давлат ва жамиятни алдамоқда. Улар мана шу 5 фоиз ортидан бойиб қолади деб ўйлайсизми. Кечирасиз, улар коронавирусдан ҳам хавфли. Занжирда битта нақдлаштирувчи аниқланса, бу барчага таъсир кўрсатади», — дейилади хабарда.

Бу каби ноқонуний ҳаракатлар амалга оширилгани бўйича йиғилган барча ҳужжатлар ҳуқуқ-тартибот органларига юборилган.

Шунингдек, ДСҚ 10 мингга яқин корхона «шубҳали» солиқ тўловчилар билан молиявий операцияларни амалга оширган ва 1 триллион сўм миқдоридаги қўшилган қиймат солиғи суммасини ҳисобга олган ҳолда буджетга тўламаганини аниқлаган.