Хоразмда ўзини Марказий банк ходими деб таништириб, ўзганинг пулини ўзлаштирган шахс аниқланди
Наманган вилояти, Учқўрғон туманида яшовчи 45 ёшли (аёл) У.Ж. ички ишлар органларига мурожаат қилиб, ўзининг банк картасидаги 4,1 млн сўм пуллари номаълум шахс томонидан ўзлаштирилганини маълум қилган.
Маълум қилинишича, ўтказилган тезкор қидирув тадбирлари натижасида мазкур жиноятни Хоразм вилоятида туғилган, Урганч шаҳрида яшовчи 25 ёшли Қ.Ж содир этгани аниқланган.
Гумонланувчи сифатида тергов ҳаракатларига жалб этилган Қ.Ж. интернет фойдаланувчиларига ўзини Марказий банкнинг мутахассис ходими сифатида таништириб, уларнинг ишончига кириш орқали банк карта маълумотларини қўлга киритиб, банк карталарида сақланган пулларни ўғирлаб, қинғир йўллар билан бойлик орттириб келаётгани маълум бўлди.
Мазкур ҳолат юзасидан К.Ж.га нисбатан Жиноят кодексининг 169-моддаси 3-қисми “б” банди (ўғрилик, қонунга хилоф равишда (рухсатсиз) ахборот тизимига кириб ёки ундан фойдаланиб) билан жиноят иши қўзғатилди.
