Қашқадарёда эр хотинини рашк сабаб «бензопила» билан ўлдирди
Қашқадарёда эр хотинини рашк сабаб ўлдирди.
Маълум бўлишича, ҳодиса Қарши тумани «Тараққиёт» МФЙда 2023 йилнинг 25 январь куни тушдан сўнг рўй берган.
Қотиллик содир этилган маҳалла масъулларининг маълумот беришича, 1982 ва 1986 йилларда туғилган эр-хотин ўртасида аввалдан келишмовчилик бўлган. Фаоллар 3 нафар фарзанди бўлган бу оилани яраштиришга уринган. Аммо аёли ҳақида турли гумонда бўлган эр хотини билан ярашишни хоҳламаган. Аёл 5 ойдан бери ўзининг уйида яшаб келаётган бўлган.
«Хотинининг телефони эрига уланган экан. Эри хотинини ҳар хил йигитлар билан гаплашади деб гумон қилган. Хуллас, жанжалга шу рашк сабаб бўлган. Марҳума аёлнинг қайнотаси бизга телефон қилди ва бизни чақирди. Мен ва профилактика инспектори тезда етиб бордик. Борсак, хотинини ўлдирган эр воқеадан сўнг ота-онасига телефон қилиб, қилган ишини айтибди ва ИИБга кетибди. Аёл уйда ерда ётган экан, эр хотинини бензопила билан елкасидан кесган эканда», — дейди МФЙ раиси Эргаш Худойқулов.
Маълум қилинишича, марҳума маҳалладаги 34-мактабда хорижий тилдан дарс берган. У 2011 йилдан бери шу мактабда ишлаб келаётган бўлган. Мактаб масъулларининг айтишича, аёл қотиллик содир бўлган куни мактабда бўлган. Тахмиман 12:00 ларда эри телефон қилганидан кейин мактабдан чиқиб кетган.
Ҳозирда эр гумонланувчи сифатида қамоққа олинган. Ҳолат юзасидан суриштирув ҳаракатлари олиб борилмоқда.
