ЖССТ ва UNICEF болаларда учрайдиган юқумли касалликдан огоҳлантирди
Жаҳон соғлиқни сақлаш ташкилоти ва UNICEF юқумли касалликларга чалиниш кўрсаткичи кескин ошганидан огоҳлантирди.
Маълум қилинишича, 2022 йилнинг дастлабки икки ойида қизамиқ билан касалланганлар сони қарийб 80 фоизга ошган. Бу ўта юқумли вирус миллионлаб болаларга хавф солишини билдиради. Статистикага кўра, январь ва февралда дунё бўйлаб қизамиққа чалиниш 17 338 тага етган, 2021 йилнинг мос давирда кўрсаткич 9665 тани ташкил этганди.
Сўнгги 12 ой ичида қизамиқ энг кўп тарқалган бешта давлат: Сомали, Либерия, Яман, Кот-д’Ивуар, Афғонистон ҳисобланади. Бу даврда касалликнинг 21 та йирик эпидемияси кузатилган. БМТнинг иккала агентлиги ҳам қизамиқ эпидемияси бошқа касалликларнинг авж олишига сабаб бўлишидан хавотир билдирган.
Қизамиқ юқумли касаллик бўлиб, айниқса ёш болалар ва чақалоқлар учун хавфли бўлиши мумкин. У Эбола вируси, грипп ёки ковиддан тезроқ тарқалади.
