Янги Ўзбекистон боғида Мустақилликнинг 34 йиллиги нишонланмоқда

«Янги Ўзбекистон» боғида мамлакатимиз давлат мустақиллигининг 34 йиллигига бағишланган байрам тадбири бўлиб ўтмоқда. Бу хакда президент матбуот хизмати хабар берди.

Маросимда Ўзбекистон Республикаси Президенти Шавкат Мирзиёев нутқ сўзламоқда. Давлат раҳбари кўп миллатли Ўзбекистон халқини, хориждаги ватандошларни Истиқлол байрами билан табриклади.

Ишончим комил, бу йўлда Янги Ўзбекистон давлати, Янги Ўзбекистон жамияти буюк тарихимизни янги, янада юксак Уйғониш даври билан боғлайдиган мустаҳкам кўприк бўлиб хизмат қилади, – деди Президент.

Президент Янги Ўзбекистонда тадбиркорлик иқтисодиётни ҳаракатга келтирувчи, олдинга бошловчи катта кучга айланганини таъкидлади. Кейинги саккиз йилда ялпи ички маҳсулоти 2 карра ошиб, ўтган йили 115 миллиард долларга, экспорт ҳажми 26 миллиард долларга етди. Йил якуни билан ялпи ички маҳсулотимиз 130 миллиард доллар бўлади. Олтин-валюта захиралари тарихда илк бор 48 миллиард доллардан ошди. Ўтган саккиз йилда қарийб 130 миллиард доллар хорижий инвестициялар кириб келди.

Давлат раҳбари Ўзбекистоннинг ташқи сиёсат борасидаги позициясини яна бир бор таъкидлади. Энг аввало, Марказий Осиё давлатлари билан кўп асрлик дўстлик, яхши қўшничилик, стратегик шериклик ва ўзаро ишонч руҳидаги алоқаларимиз сифат жиҳатидан янги босқичга олиб чиқилиши айтилди.

Жумладан, мустақил Давлатлар Ҳамдўстлиги, Шанхай Ҳамкорлик Ташкилоти мамлакатлари билан анъанавий кенг қамровли ва стратегик шериклик алоқалари янада кенгайтирилади. АҚШ, Европа ва бошқа ривожланган давлатлар билан савдо-иқтисодий, молиявий, инвестициявий ва технологик ҳамкорлик ривожлантирилади, кенг кўламли шериклик ва амалий алоқалар мустаҳкамланади.

Шунингдек, Жанубий Осиё, Яқин ва Ўрта Шарқ, Африка минтақасидаги мамлакатлар билан янги ва истиқболли йўналишларда ўзаро манфаатли ҳамкорлик учун транспорт-логистика йўлакларини яратишга алоҳида эътибор қаратилади.

Президент қандай синов ва машаққатлар пайдо бўлмасин, демократик ислоҳотларни чуқурлаштириш, миллий бирлик ва ҳамжиҳатликни мустаҳкамлаш, халқимизни рози қилиш йўлидан асло ортга қайтилмаслигини таъкидлади.

Бошлаган буюк ишларимизни албатта охирига етказамиз. Ҳеч қачон унутмайлик: биз барчамиз битта халқ, битта мамлакат, битта оиламиз! Ҳаммамизнинг тақдиримиз, келажагимиз, бахтимиз ва ютуғимиз ҳам ягона ва муштарак. Ҳар бир ватандошимнинг ютуғи – бу менинг ютуғим, ташвиши – менинг ташвишим, деган фикр билан яшасак, ютуғимиз кўпайиб, ташвишимиз албатта камайиб боради. Яшасин Ўзбекистон давлати! Яшасин Ўзбекистон халқи!, –деди Президент нутқининг якунида.