Тошкентда банк карталаридан пул ўзлаштирган жиноий гуруҳ фош этилди

Тошкент шаҳрида фуқароларнинг банк карталаридан пул ўғирлаган жиноий гуруҳ фаолияти фош этилди. Бу ҳақда ИИВ Киберхавфсизлик маркази хабар берди.

Маълум қилинишича, жиноий гуруҳ аъзолари турли давлат фуқаролари бўлиб, улар Telegram орқали махсус гуруҳ ташкил этиб, одамларнинг телефонига зарарли APK файллар юборган. Ушбу файлларни юклаган шахсларнинг телефонидан SMS-кодлар, контактлар, қўнғироқлар тарихи ва банк реквизитлари ўғирланган.

Натижада, 177 нафар фуқаронинг банк карталаридан умумий ҳисобда 1 млрд сўмга яқин пул маблағлари ноқонуний тарзда ечиб олинган. Жиноий ҳаракатлар махсус Cаll-марказ орқали бошқариб борилган.

Ҳозирда ушбу гуруҳнинг қолган аъзоларини аниқлаш ва жиноятни тўлиқ фош этиш бўйича суриштирув ишлари давом этмоқда. Гумонланувчиларга нисбатан Жиноят кодексининг тегишли моддалари билан иш қўзғатилиб, улар процессуал тартибда қўлга олинган.