Навоийда 17,5 минг долларни хорижга олиб чиқмоқчи бўлган тўрт киши ушланди
Навоий халқаро аэропортида хорижга 17,5 минг долларни ноқонуний равишда олиб чиқишга уринган тўрт киши ушланди.
Маълум қилинишича, Навоий аэропорти чегара-божхона постида қўшни мамлакатга учиб кетаётганлар орасидан тўрт нафар фуқаронинг хатти-ҳаракати божхоначилар эътиборини тортган. Ушбу шахслар белгиланган тартибда тўхтатилиб, назоратдан ўтказилган. Натижада уларнинг ёнида ўзларига тегишли бўлмаган валюта борлиги аниқланган.
Қўлга олинган эркаклардан бири жами 17,5 минг долларни божхонадан олиб ўтиш учун уч кишига бўлиб берган.
Таъкидланишича, Навоий аэропортида валютани ноқонуний равишда хорижга олиб чиқиш ҳолати сўнгги икки ойда иккинчи бор кузатилмоқда. Ҳолат юзасидан терговга қадар текширув ҳолатлари бошланган.
