Фарғонада Damas ва юк машинаси тўқнашуви оқибатида 2 нафар фуқаро ҳалок бўлди
Фарғона вилояти Фурқат туманида Damas ва юк машина ўртасида ЙТҲ содир бўлди. Бу ҳақда Ренессанс телеканалининг «Овоза» дастури хабар бермоқда.
Қайд этилишича, Damas ҳайдовчиси оралиқ масофани сақлай олмай, ўзидан олдинда кетаётган юк машинаси билан тўқнашган.
ЙТҲ оқибатида енгил автомобилга жиддий техник зарар етган. Унинг ҳайдовчиси ва йўловчилари туман тез тиббий ёрдам бўлимига юборилган.
Шифокорнинг сўзларига кўра, муассасага 2 нафар вафот этган шахс ҳамда бир бемор олиб келинган.
Беморнинг умумий аҳволи оғир ҳолатда бўлган. Тан жароҳати бўлган. Бемор ўз ҳолатига келгандан сўнг, уни Қўқонга реанимация бўлимига ўтказдик, — дейилади хабарда.
Ҳозирда ҳолат юзасидан Жиноят кодексининг 266-моддаси (Транспорт воситалари ҳаракати ёки улардан фойдаланиш хавфсизлиги қоидаларини бузиш) билан жиноят иши қўзғатилиб, тергов ишлари олиб борилмоқда.
