Жиззахда 4 млрд сўмдан ортиқ газни талон-торож қилган цех аниқланди
Жиззах шаҳрида 4,6 млрд сўмлик табиий газдан ноқонуний фойдаланган оҳак ишлаб чиқариш цехи фош булди. Бу ҳақда «Худудгазтаъминот» матбуот хизмати хабар берди.
Хусусан, газ таъминоти назорат тузилмалари ва шаҳар газ таъминоти бўлими ходимлари томонидан 2025 йил 30 август куни ўтказилган рейд жараёнида қонунбузилиш ҳолати аниқланган.
Шаҳарнинг «Маданият» МФЙда жойлашган фуқарога қарашли хонадонда ваколатли ташкилотлар билан шартнома имзоламасдан, лойиҳа техник ҳужжатларисиз 3 дона ностандарт газ ёндиргичлар орқали оҳак тайёрлаш учун табиий газдан ноқонуний фойдаланиб келинган.
Ноқонуний ҳолат юзасидан «Жиззахшаҳаргаз» газ таъминоти бўлими, ҳуқуқ-тартибот органлари ва Ўзэнергоинспекция ходимлари иштирокида далолатнома тузилиб, табиий газ ҳажмлари қайта ҳисоб-китоб қилинди.
Дастлабки ҳисоб-китобларга кўра 4 миллиард 691 миллион сўмлик зарар етказилгани маълум бўлди, — дейилади хабарда.
Хозирда, барча ҳужжатлар ҳуқуқни муҳофаза қилувчи органларга юборилган.
