Россиянинг Одеcсага берган дрон ҳужумида 1 киши ҳалок бўлди
10 июнь тонгида Россия Украинага навбатдаги дрон ҳужумини амалга оширди. Бу ҳақда BBC хабар берди.
Ҳужумлар Киев ва Одеса шаҳарларини нишонга олган.
Одеса вилояти губернатори Олег Кипернинг маълум қилишича, дрон зарбалари натижасида тиббиёт муассасалари ва турар жой бинолари зарар кўрган, 59 ёшли эркак ҳалок бўлган, тўрт киши тан жароҳати олган. Туғуруқхона ва тиббиёт пункти ходимлари ва беморлар эвакуация қилинган, айрим тез ёрдам машиналари ҳам зарар кўрган.
Киевда эса бир неча туманларда портлашлар қайд этилган.
Пойтахт мери Виталий Кличко Телеграмда Киевга кенг кўламли дрон ҳужуми амалга оширилмоқда, хавфсизлик сабаб паноҳ жойларда қолинг, дея баёнот берган.
Киев ҳарбий маъмурияти раҳбари Тимур Ткаченконинг маълумотига кўра, бир нечта туманларга бир вақтнинг ўзида зарба берилган, турар жой биноси ва омборхоналарда ёнғинлар юзага келган.
