Ургутда ярим асрлик чекка ҳудуддаги ягона поликлиника бутунлай янгиланди
Самарқанд вилояти Ургут туманидаги 21-сонли оилавий поликлиника тўлиқ таъмирлаш жараёнидан ўтди.
Қайд этилишича, 1972-йилда қурилган Ургут туманининг «Баҳрин» маҳалласидаги 21-сонли оилавий поликлиника 16 та қишлоқ аҳолиси – 13 мингдан ортиқ инсон учун ягона тиббиёт маскани эди. Бино ярим асрдан ортиқ вақт давомида капитал таъмирланмаган.
Деворлари нам тортган, томидан сув ўтадиган, шароити оғир хоналарда шифокорлар бемор қабул қилишга мажбур бўлган. Шунга қарамай, минглаб инсонлар айнан шу масканга таяниб яшаган.
Ушбу ҳолат 2025-йил декабрь ойида Президент Администрацияси раҳбари Саида Мирзиёева томонидан жойига бориб ўрганилган эди.
Натижада, Шавкат Мирзиёев ташаббуси билан бу маскан бутунлай янгиланди. Поликлиника тўлиқ реконструкция қилиниб, қўшимча корпус қурилди ва 20 ўринли янги туғруқ бўлими ташкил этилди. Эндиликда аҳоли замонавий, ёруғ ва қулай шароитларда тиббий хизматдан фойдаланмоқда.
