Тошкентда қурилишига рухсат берилмаган уйлар учун юзлаб одамлар пул тўлагани аниқланди

Олмазор туманида қурилишга рухсатнома олинмаган уйларга юзлаб фуқаролар тўлов қилгани аниқланди. Қурилиш ва уй-жой коммунал хўжалиги вазирлиги ушбу ҳолат юзасидан расмий муносабат билдирди.

Бу ҳолат ижтимоий тармоқларда кенг муҳокамаларга сабаб бўлди.

Маълум қилинишича, «Чилтўғон» маҳалласи, Уста Олим 2-берк кўчасида жойлашган қурилиш ишларини Strong Cities МЧЖ амалга оширган. Бироқ ушбу объект бўйича қонунчиликда белгиланган тартибда қуйидаги рухсат ва ҳужжатлар олинмаган:

• Қурилишга рухсатнома;

• Архитектура-режалаштириш топшириғи;

• Тошкент шаҳар Қурилиш бошқармаси билан келишилган лойиҳа-смета ҳужжатлари.

Тошкент шаҳар Қурилиш ва уй-жой коммунал хўжалиги соҳасида ҳудудий назорат инспекцияси томонидан ўтказилган текширувда, объектда фақат ерга оид кадастр ҳужжатлари борлиги, бироқ қурилиш ва монтаж ишларини бошлаш учун зарур бошқа ҳужжатлар йўқлиги аниқланган.

Шу сабабли қурилиш ишлари қонуний огоҳлантириш асосида тўхтатилган. Яна бир муҳим жиҳат — объект сейсмик хавфсизлик талаблари талабларига жавоб бермаган. Натижада қурувчи ташкилот ўз ихтиёри билан қурилмани демонтаж қилиш ишларини бошлаган.

Қурувчи ташкилот вакиллари лойиҳа-смета ва бошқа техник ҳужжатларни қайта кўриб чиқиб, уларни тўлиқ расмийлаштиргач, қурилишни қонуний тартибда давом эттириш режалаштирилганини маълум қилган.

Вазирлик аҳолига мурожаат қилиб, уй-жой харид қилишда объектдаги барча рухсатнома ва ҳуқуқий ҳужжатларни пухта текширишни тавсия қилди.