Тошкентдаги «Автомобиль эҳтиёт қисмлари» бозорида товламачилар қўлга олинди

Учтепа туманида жойлашган «Автомобиль эҳтиёт қисмлари» бозорида фаолият юритган 12 кишидан иборат жиноий гуруҳ аниқланиб, қўлга олинди. Бу ҳақда ДХХ хабар берди.

Текширувларга кўра, гумондорлар мижозларнинг рухсатисиз уларга техник хизмат кўрсатиб, турли жиҳозларни ўрнатган. Сўнгра ушбу хизматлар учун бозордаги асл нархи $600 бўлишига қарамасдан, фуқаронинг ўзидан $13,3 мингни товламачилик йўли билан ундириб олинган. Ҳақини талаб қилган мижоз таҳдид билан қўрқитилган.

Яна бир ҳолатда, автомашина калитини олиб қўйиш орқали фуқаро босим остида 15 млн сўм тўлашга мажбур қилинган. Шунингдек, икки фуқаро машинасини эҳтиёт қисмлар билан жиҳозлаш ваъдаси билан улардан 70 млн сўм олинган, бироқ ваъдаларнинг бирортаси бажарилмаган.

Жиноятчиларнинг аксарияти 1988–2002 йиллар оралиғида туғилган бўлиб, илгари судланган шахслар экани айтилмоқда.

Уларнинг барчасига нисбатан Жиноят кодексининг 165-моддаси (товламачилик) ва 168-моддаси (фирибгарлик) асосида жиноят иши қўзғатилди ҳамда қамоқ эҳтиёт чораси қўлланилди.

Ҳозирда тергов доирасида гуруҳ аъзоларининг бошқа жиноятларга алоқадорлиги ва жабрланган фуқароларнинг шахсига аниқлик киритилмоқда.