Тошкентда йўловчи автомобилдан сакради
Тошкентда Nexia русумли автомобилда кетаётган йўловчи қиз ҳаракатланаётган машинадан сакраб тушди. Бу ҳақда ИИББ маълумот берди.
Қайд қилинишича, ҳодиса 7 июль куни соат 11:00 атрофида Мирзо Улуғбек туманининг Мустақиллик кўчасида юз берган.
Дастлабки текширувга кўра, ҳайдовчи Х.А. ва йўловчи Б.Ж. ўртасида келишмовчилик бўлган, шундан сўнг Б.Ж. автомобиль эшигини очиб, йўлга сакраган.
Воқеа жойида хизмат олиб бораётган Ички ишлар органлари ходимлари зудлик билан воқеага аралашиб, жабрланувчига биринчи тиббий ёрдам кўрсатган ва шифохонага етказган. Дастлабки маълумотларга кўра, қиз пешона ва чап ёноқ соҳасидан тан жароҳати олган, унга «юмшоқ тўқималар лат ейиши ва тери ости гематомаси» ташхиси қўйилган.
Ҳолат юзасидан терговга қадар текширув ишлари олиб борилмоқда.
