АҚШда юк самолёти ҳалокатга учраши оқибатида 5 киши ҳалок бўлди
Ҳаво кемаси йирик логистика мажмуаси олдидаги автотурагоҳда турган автомобилларга бориб урилган, ҳодиса жойида ёнғин чиққан
Пуэрто-Рикодан Майами халқаро аэропортига рейс бажараётган «Amazon Air» авиакомпаниясининг юк самолёти учиш-қониш йўлагидан чиқиб кетиши ва ёнғин чиқиши оқибатида камида 5 киши ҳалок бўлди. Бу ҳақда BBC хабар бермоқда.
Майами ёнғин хавфсизлиги хизмати раҳбари Райед Жадаллаҳнинг маълум қилишича, ҳодиса оқибатида яна 5 киши жароҳатланган. Улардан 3 нафари оғир аҳволда.
Қайд этилишича, «Boeing 767» юк самолёти қўниш чоғида учиш-қониш йўлагидан чиқиб кетган ва йирик логистика мажмуаси олдидаги автотурагоҳда турган автомобилларга бориб урилган. Ҳодиса жойида ёнғин чиққан. Баъзи жабрланувчилар автомобиллар ичида қолиб кетган.
Ҳодисадан сўнг аэропорт ёпилган, оқибатда кўплаб рейслар кечиктирилган. Кейинчалик у ўз фаолиятини қайта тиклади, аммо йўловчиларни юзага келиши мумкин бўлган узилишлар ва кечикишлар ҳақида огоҳлантирди.
АҚШ Миллий транспорт хавфсизлиги кенгаши ҳалокат сабабларини суриштириш ва тергов қилиш билан шуғулланаётганини маълум қилди.
