«Дарахтда осилган ҳолда турганини кўрдим. Жони узилиб бўлган экан». Қашқадарёда эркак ўзини осиб қўйди

Қашқадарё вилояти Қарши шаҳрида 19 январь куни 38 ёшли эркак устахонада ўзини осиб қўйди.

Маълум бўлишича, шаҳарнинг Ойдин маҳалласидаги устахоналарининг биридаги дарахтда 1984 йилда туғилган Н.Н. исмли эркак осилган ҳолда топилган. Марҳум билан бирга ишлаган машиналарга хизмат кўрсатиш усталарининг айтишича, унинг ёнидан хат чиққан.

«Чоршанба куни эрталаб келсам, дарвоза очиқ экан. Кейин унинг дарахтда осилган ҳолда турганини кўрдим. Жони узилиб бўлган экан», — дейди шахси сир қолишини сўраган усаталардан бири.

Ҳозирда ўзини осиб қўйгани тахмин қилинаётган эркакнинг мурдаси топилган дарахт кесиб ташланган.

«Ўша куни ҳамма усталар билан дарахтни кесиб олдик. Кейинроқ билсак, ёнимиздаги савдо дўконидаги камерага марҳумнинг ип олиб, ичкарига кириб кетгани тушиб қолган экан», — дейди яна бир воқеа гувоҳи.

Шу билан бирга, марҳум Қарши шаҳридаги автомобиль етказиб бериш ва сотиш билан шуғулланувчи савдо марказида ишлаган. Аммо марказ ходимларидан изоҳ олиш ва боғланишнинг иложи бўлмаган.

Вилоят прокуратурасининг «Bugun.uz»га маълум қилишича, ҳозирда мазкур ҳолат юзасидан Қарши шаҳар прокуратураси томонидан терговга қадар текширув ҳаракатлари олиб борилмоқда.

«Энг ёмони вафот этган эркак устидан бир гуруҳ автомашина харид қилиб, адланиб қолган фуқаролар ҳам сайт мухбирига мурожаат қилмоқда. Бу мурожаатлар юзасидан тез орада интервьюларни ҳам тақдим этамиз», дейилади хабарда.