Соғлиқни сақлаш вазирлиги ҳузурида янги фонд ташкил қилинади

Соғлиқни сақлаш вазирлиги ҳузурида онкогемотологик ва даволаш мураккаб бўлган касалликларга чалинган беморларни даволашга кўмаклашиш учун жамғарма ташкил этилмоқда.

Фото:ССВ

Маълум қилинишича, фонд тиббий ускуна ва дори-дармонларни, реактивларни сотиб олади ва операция учун хориждан мутахассисларни таклиф қилади.

Қайд этилишича, 8 апрель куни Вазирлар Маҳкамаси томонидан бу ҳақда қарор қабул қилинган.

Таъкидланишича, жамғарма маблағлари давлат бюджетига тушадиган тамаки маҳсулотларига қўйилган акциз солиғи суммасининг 7 фоизидан ва жамғарманинг вақтинча бўш турган маблағларини банкларга омонат сифатида жойлаштириш ҳамда аҳоли ва компаниялар томонидан хайрия қилинган маблағлар ҳисобига шакллантирилади.

Ушбу маблағлар ускуна ва дори-дармон воситалари, тиббий буюмлар, лаборатория реактивлари ва бошқа сарф-ҳаражатларга ишлатилади.

Шунингдек, жамғарма маблағлари хориждан мураккаб операцияларни ўтказиш ва ташхис қўйиш учун таклиф қилинадиган мутахассислар харажатларини қоплаш учун ҳам сарфланади.