Россияда террорчиликни тарғиб қилган ўзбекистонлик эркак қўлга олинди
Россияда «Тавҳид ва жиҳод катибаси» террорчилик ташкилотини ижтимоий тармоқларда тарғиб қилган ўзбекистонлик эркак 17 йилга қамалди.
Маълум бўлишича, эркак 2019 йилда иммиграция қонунчилигини бузгани учун Россиядан чиқариб юборилган. Бироқ бир неча кундан кейин у илгари яшаб ишлаган Хабаровск шаҳрига алдов йўли билан қайтиб келган.
«У Хабаровскка қайтиб келгач, тақиқланган халқаро террорчилик ташкилот ‘Жабҳат ан-Нусра’нинг таркибий бўлинмаси ‘Тавҳид ва жиҳод катибаси’ террорчилик гуруҳига ихтиёрий равишда қўшилганини тан олган. Унга ижтимоий тармоқларда жиҳодчиликни тарғиб қилиш вазифаси юклатилган», дейилади хабарда.
Таъкидланишича, ўзбекистонлик эркак буни амалга ошириш учун ижтимоий тармоқлардан бирида канал очган ва у ерда терроризмга оммавий чақириқлар ва экстремизмни оқловчи постларни жойлаштирган. Шунингдек, ҳамюртларини мазкур фаолият билан шуғулланишни сўраган.
Ҳолат юзасидан эркакка нисбатан 17 йилга озодликдан маҳрум қилиш жазоси тайинланган. У дастлабки 4 йилни қамоқда, қолган муддатни қаттиқ режимли колонияда ўтказади.
