Кун қаҳрамони: Сабина Бекмуродова — фото
Сабина (Эльмира) Бекмуродовани «Tabloid» кун қаҳрамони сифатида эълон қилди.
Сабина Бекмуродова Давлат санъат институтини тамомлаган. У журналистик фаолиятини 2009 йил «НТТ» нодавлат-нотижорат телеканалида мухбир сифатида бошлаган. 2010–2013 йилларда «Форум-ТВ» телеканали муҳарририга айланган. 2013–2016 йиллар давомида Сабина Ўзбекистон Электрон оммавий ахборот воситалари миллий ассоциациясининг «Ижтимоий медиа-маҳсулотларини тайёрлаш ва жойлаштириш» лойиҳасига раҳбарлик қилган.
Сабина ҳозирда энергетика вазирининг ахборот масалалари бўйича маслаҳатчиси, шунингдек, вазирлик матбуот котиби сифатида фаолият юритади. Сабина Энергетика вазирлигида у ер ташкил этилганидан бери ишлайди.
Бунгача — 2019 йил февраль ойида вазирлик ташкил этилгунга қадар — «Ўзбекнефтгаз» АЖ, «Ўзатом» агентлиги каби ташкилотларнинг ахборот хизмати гуруҳи таркибида ишлаган. Ҳозирда Энергетика вазирлиги ушбу ташкилотлар фаолиятини мувофиқлаштиради.
Сабинанинг фаолияти Энергетика вазирлигининг ахборот сиёсатини юритишдан иборат. Сабинадан онлайн оммавий ахборот воситалари, телевидение, радио ва босма ОАВ журналистлари билан доимий яқин алоқада бўлиш талаб этилади.
«Ҳаётимда энг муҳим икки нарса бор: оила ва иш. Шунинг учун мен ишдан бўш вақтимни ўзимнинг севимли оиламга, болаларимга ва турмуш ўртоғимга бағишлайман. Ҳар қандай инсон ҳаёти учун энг муҳим жараён бу фарзандларини тарбиялаш жараёнидир», — дейди Сабина.
У муттасил ўз устида ишлаб боришни ният қилган. Унинг фикрича, ҳар доим вазирлик мутахассислари ва матбуот хизмати қилаётган ишлар аудитория учун фойдали бўлиши керак.
«Ўзингиз учун ишда муносиб жой топганингизда, сўралган талабларга жавоб бера олганингизда сиз яқинларингизнинг ҳурматини ҳис қиласиз. Қачонки оилада бахтли бўлсангиз, ишингиз ҳам самаралироқ бўлади. Бу тушунчаларни бир-биридан ажратиш мумкин эмас. Оила ва касб — улар бир-бирига чамбарчас боғлиқ», — дейди кун қаҳрамони.