Тожикистон Туркия фуқаролари учун виза режимини жорий қиляпти
Тожикистон Ташқи ишлар вазирлиги вакилининг 15 апрел куни айтишича, қарор жорий йилнинг 20 апрелидан кучга киради.
«Туркия фуқаролари Тожикистон визасини Тожикистон Республикасининг хориждаги элчихоналари ва консулликларида олиши мумкин», — деди у.
5 апрел куни Туркия президенти Ражаб Тоййиб Эрдўған Тожикистон фуқаролари учун визасиз режимни бекор қилиш ҳақидаги фармонни имзолади. Фармон матнида шундай дейилади: «Тожикистоннинг оддий чет эл паспортига эга фуқаролари учун Туркияга саёҳат қилишда визасиз режимни бекор қилиш тўғрисида қарор қабул қилинди». Тожикистон фуқаролари учун виза режими жорий йилнинг 20 апрелидан жорий этилади.
Тожикистон фуқаролари учун виза режимини жорий қилиш сабаблари аниқлаштирилмаган, бироқ кўплаб рус оммавий ахборот воситалари буни Тожикистон фуқаролари гумонланувчи сифатида қайд этилган Россия ва Туркиядаги терактлар билан боғламоқда.
Анқара «Крокус»даги терактдан сўнг икки гумондор Туркияда қисқа вақт қолгандан сўнг Истанбулдан Москвага учиб кетганини билдирди. 22 март куни Москва яқинидаги концерт залида содир этилган ҳужумда 140 дан ортиқ одам ҳалок бўлди.
2018 йилдан буён Тожикистон фуқаролари ўнлаб бошқа давлатлар фуқаролари каби Туркияга визасиз кириши ва у ерда 90 кунгача қолиши мумкин эди.
Тожикистон ва Туркияни Turkish Airlines ва маҳаллий «Сомон Эйр» авиакомпанияси томонидан амалга ошириладиган тўғридан тўғри рейслар боғлайди. Ҳафта давомида Тожикистондан олтита самолёт Истанбулга учади. Йўловчиларнинг аксарияти тадбиркорлар ва бизнес тузилмалари вакилларидир. Истанбул Тожикистон фуқаролари учун халқаро рейслар учун муҳим транзит пункти ҳисобланади.
Тожикистон Ташқи ишлар вазирлиги маълумотларига кўра, 2022 йилда икки давлат ўртасидаги товар айирбошлаш ҳажми 350 миллион доллардан ортиқни ташкил қилган.
