Бухорода сўнгги 7 ойда электрон аукцион орқали 2 миллиард 80 миллион сўмлик ер участкаси сотилди
Бухоро туманида сўнгги 7 ойда электрон аукцион орқали 2 миллиард 80 миллион сўмлик ер участкаси сотилди. Бу ҳақда вилоят ҳокимлиги ахборот хизмати хабар берди.
Маълум қилинишича, Бухоро туманида тадбиркорларга ерлар онлайн аукцион тартибиди берилмоқда. Туманда 17 август ҳолатига кўра, 12 та ер участкаси 2 миллиард 80 миллион сўмга электрон савдо майдончаси орқали сотилган.
Қайд этилишича, Бухоро тумани ер-кадастр давлат корхонаси йил бошидан буён бош вазир қабулхонасининг тадбиркорлар мурожаатларини кўриб чиқиш бўлими билан ҳамкорликда 590 та хонадоннинг кадастр ҳужжатлари онлайн расмийлаштирган. Шунингдек, корхона кўп қаватли хонадонларнинг 86 тасинининг ҳамда нотурар жой объектларининг 141 тасининг кадастр ҳужжатларини худди шу тартибда расмийлаштириб берган.
«Фуқароларимиз томонидан қилинган хат ва мурожаатларнинг 50 дан ортиғи ўз муддатида ўрганиб чиқилди», — деди Бухоро тумани ер-кадастр давлат корхонаси бошлиғи Aзим Мирҳаев.
Эслатиб ўтамиз, аввалроқ Бухорода аукционга қўйилган бўш ер участкалари рўйхати эълон қилингани ҳақида хабар берилган эди. Шунингдек, Бухоро туманида 2 гектар ер участкаси 1,6 миллиард сўмга сотилгани маълум қилинганди.
