“Jomiy” bozori yaqinidagi bir nechta qurilish do‘konlarida kelib chiqqan yong‘in o‘chirildi
Toshkent shahri “Jomiy” bozori yaqinidagi bir nechta qurilish do‘konlarida 22-iyul kuni kelib chiqqan yong‘in o‘chirildi. Bu haqda Favqulodda vaziyatlar vazirligi xabar berdi.
Foto: «UzNews»
Xabarda aytilishicha, yong‘in soat 15:34 da boshlangan. Hodisa joyiga bir necha daqiqada Toshkent shahar Favqulodda vaziyatlar boshqarmasining 6 ta o‘t o‘chirish va qutqaruv guruhi yetib keldi.
Soat 16:01 da yong‘in mahalliylashtirildi va 16:14 da butunlay o‘chirildi. Deyarli 200 kvadrat metr joy yonib ketdi. Mutaxassislar yong‘in sabablarini o‘rganmoqda. Favqulodda vaziyatlar vazirligi qutqaruvchilarining tezkor harakatlari tufayli yong‘inga yaqin joyda joylashgan do‘konlarning 2 ming kvadrat metr hududi qutqarib qolindi.
Avvalroq Farg‘onada harbiy xizmatchi yong‘inda qolgan odamlar hayotini saqlab qolgani xabar berilgan edi. Shuningdek, Yozyovon tumanida choyxona va savdo do‘konlarida ham yong‘in chiqqan edi.
