ҲАМАС араб давлатларидан қурол ва молиявий ёрдам сўради

Фаластиннинг ҲАМАС ҳаракати Сиёсий бюроси раҳбари Исмоил Ҳаниянинг айтишича, Ғазо секторига қарши давом этаётган Исроил агрессияси бутун минтақани назоратдан чиқариб юбормоқда. У араб ва ислом давлатларини ҲАМАСни қурол-яроғ ва молия билан қўллаб-қувватлашга чақирди.

«Ғазода қаршилик давом этмоқда. Мен араб ва ислом халқлари ва дунёнинг озод халқини… бу қаршиликни қўллаб-қувватлашга ҳамда ушбу инқилобни пул, қурол билан қўллаб-қувватлашга чақираман», — деб ёзади Ҳания.

Ҳаракат раҳбари, шунингдек, Ғазо билан чегарада назорат-ўтказиш пунктларини очиш ва минтақага «керак бўлган ҳамма нарсани чекловларсиз ва шартларсиз» юборишга чақирди.

У электр ва сув таъминоти қайта тикланишини талаб қилмоқда.

«Мен барча президентлар, етакчилар, зиёли етакчилар ва фикр билдирувчиларни Фаластин қаршилиги ҳамда ҲАМАСнинг қонунийлигини аниқ ва сўзсиз тасдиқлашга чақираман», — дея қўшимча қилди Ҳания.