«Ўзгидромет» март ойи аномал ёмғирли бўлганини маълум қилди
«Ўзгидромет» 2022 йилнинг март ойи жуда ёмғирли бўлганини маълум қилди.
Маълум қилинишича, Шимолий ҳудудлардан ташқари, республика ҳудудининг катта қисмида ёғингарчилик миқдори ойлик меъёрдан сезиларли даражада кўп бўлди. Республиканинг тоғли ва тоғли олди ҳудудларида ёғингарчилик одатдагидан 2–3 марта кўп бўлди. «Хусусан, Тошкентда деярли 2 ойлик ёғингарчилик миқдори ёғди», дейилади хабарда.
Қайд этилишича, жадал ёмғирнинг давомийлиги ҳам анормалдир. 5 мартдан бугунги кунга қадар деярли ҳар куни бироз танаффус билан ёмғир ёққан. Энг кучли ёмғир 11–15 март кунлари кузатилган. Республика бўйича баъзи жойларда бир кеча-кундузда ёғган ёғингарчилик миқдори айрим кунларда 25–40 миллиметр, тоғли ҳудудларда баъзи жойларда 50–60 миллиметргача бўлган.
«Шу билан ёмғирлар тугамади. 18 мартга қадар Ўзбекистон ҳудудининг катта қисмида ёмғирлар танаффус билан ёғади, баъзи жойларда кучли бўлади. 18 мартда республика бўйича баъзи жойларда ёмғир қорга айланиш эҳтимоли бор. Республиканинг шимолида ёмғир ва қор кўринишидаги ёғингарчилик ушбу кунларда бироз бўлади. 18 мартдан сўнг ёғингарчилик 2–4 кунга танаффус қилиши кутилмоқда. Кейинчалик, март ойининг охиригача бу кунлар каби кучли ва узоқ муддатли ёмғир ёғишини биз кутмаяпмиз», — дейилади хабарда.
Келтирилишича, 2003, 2012 ва 2021 йилларнинг март ойларида ҳам жуда ёмғирли об-ҳаво кузатилган, аммо бу йилги каби жадал ва давомийлиги узоқ муддатли ёмғирлар илгари кузатилмаган.
Иқлимшунос олимларнинг фикрича, глобал исиш ёғингарчилик кўпайишига олиб келмайди. Бироқ, улар экстремал об-ҳаво ҳодисаларининг кўпайишига, шу жумладан, аномал қуруқ ёки аномал нам даврларнинг такрорийлиги кўпайишига олиб келади. 2022 йилнинг март ойи бунинг ёрқин тасдиғидир.
