Fitch Ўзбекистон ялпи ички маҳсулоти 2022 йилда 3,1 фоизга ўсишини прогноз қилди
Fitch халқаро рейтинг агентлиги Ўзбекистон ялпи ички маҳсулоти 2022 йилда 3,1 фоизга ўсишини прогноз қилди.
Агентликнинг янгиланган прогнозига кўра 2022 йилда Ўзбекистоннинг реал иқтисодий ўсиш суръати 3,1 фоизни ташкил қилади.
Бу прогноз пул ўтказмалари камайиши туфайли уй хўжаликлари истеъмолининг камайиши, инвестиция лойиҳаларининг кечикиши, ташқи қарз жалб қилиш шартларининг қатъийлашиши, валютанинг кўпроқ қадрсизланиши ва юқорироқ инфляция кутилмалари билан изоҳланган.
Қайд этилишича, мамлакатдаги мавжуд захиралар, амалга оширилаётган сиёсатнинг такомиллашганлиги, хом-ашё (олтин ва бошқалар) экспорти диверсификациялангани ҳамда халқаро молия ташкилотларидан молиявий ва техник кўмак олиш имконияти республикада макроиқтисодий барқарорликни, ташқи ва фискал захираларни ва иқтисодий ислоҳотлар натижаларини сақлаб қолиш имкониятини яратади.
Fitch’нинг кутилмаларига кўра, фискал сиёсат ва хом-ашё (олтин, мис ва газ) экспорти учун қулай нархлар шокнинг таъсирини юмшатишга хизмат қилади. Таъкидланишича, миллий валюта курсининг пасайиши, юқорироқ инфляция кутилмалари ва озиқ-овқат нархлари сабабли 2022 йилда инфляция даражаси ўртача 12,7 фоизни ташкил қилади.
