Сергелидаги можаро видеосида шикоят қилган аёл ҳайитлик пулини олганини айтиб, англашилмовчилик учун узр сўради
Ижтимоий тармоқларда тарқалган Сергелидаги можаро видеосида маҳалла маъмуриятидан шикоят қилган аёл ҳайитлик пулини олганини айтиб, англашилмовчилик учун узр сўради. Aслида видеода ёрдам олмагани айтилган оилага давлат томонидан доимий равишда ёрдам бериб келингани маълум бўлди.
“Ёнимдаги эркак киши олмадим, деса мен ишониб ўтирибман. Мен уларнинг гапига қўшилиб, бу одам ҳам олмади, деб айтиб юбордим. Ваҳолангки, бугун бориб қарасак, хотини эридан беркитган, эр хотинидан беркитган — 2,5 миллионни олишган экан улар. Ҳайитликка берилган 1 миллион сўмни ҳам мендан олдин олиб бўлишган экан. Яна ҳомийлар ҳам ёрдам бераркан. Лекин бу гапни биздан беркитиб, менинг важоҳатимдан фойдаланиб, гапирса, ўзимдек кўрибман”, — дейди аёл.
Маълум бўлишича, ушбу оила апрель-май ойида 2,5 миллион сўм ёрдам пулини олган. Шунингдек, 1 миллион сўм ҳайитлик олган. Ундан ташқари, оилага меҳр-мурувват орқали олиб келинаётган озиқ-овқат маҳсулотлари ҳам бериб борилган экан.
Аввалроқ, Наманганда ишсизларга ажратилган 216 миллион сўм, Шаҳрихонда кам таъминланган оилаларга ажратилган 82 миллион сўм, Aндижонда Санитария-эпидемиологик осойишталик маркази мансабдор шахслари томонидан 159,3 миллион сўмлик бюджет маблағлари талон-торож қилингани ҳақда хабар берилганди.
