Олимлар коронавирус яна бир хасталикни кучайтириб юборишини аниқлади
COVID-19 билан интенсив терапияга ётқизилган беморлар ЎРВИ (ўткир респираторли вирусли инфекция)нинг бошқа шакллари билан оғриган беморларга қараганда мия дисфункциясидан кўпроқ азият чекмоқда. Америкалик ва испаниялик олимлар тадқиқотга асосланиб ушбу хулосага келди, деб ёзади «Eurekalert».
Фото: Алексей Даничев
Таъкидланишича, Теннеси штатидаги Вандербильт университети Америка тиббиёт маркази мутахассислари испаниялик олимлар билан биргаликда 14 та мамлакатда коронавируснинг оғир шаклига чалинган 2 мингдан ортиқ беморни кузатган. Уларнинг миясидаги дисфункция ўзини турли йўллар билан намоён қилган: нутқнинг бузилиши, ориентация, диққатни жамлай олмаслик ёки ҳатто кома ҳолатлари ҳам учраган.
Вандербильт университети ходими Бренда Пуннинг сўзларига кўра, беморлар ўртача 12 кун давомида комада ётган. Бу COVID-19’га чалинмаганлар сонидан икки баравар кўп ҳисобланади. Коронавирусга чалинмаган беморларда кома ўртача тўрт кун давом этган ва яна бир кун улар делирий ҳолатида бўлган (онг билан боғлиқ руҳий касаллик: фикрлаш ва ҳиссиётларнинг бузилиши).
«Бундай оқибатларга олиб келмаслик учун мутахассислар COVID-19’ни даволашда, нафас олиш машқларида, яқинларингиз билан мулоқотда бўлишда хавфсизлик чораларига риоя қилишни тавсия этади», дейилади хабарда.
Аввалроқ коронавирус мутациясининг янги хусусияти маълум бўлгани ҳақида хабар берилган эди. Шунингдек, Англияда коронавирусга чалинган эркакнинг оёғи кесиб ташланган.
